Alles Mooi se reis het in 2010 begin — ’n jaar gevul met wag, wonder en vreugde toe ek my dogtertjie verwag het. Terwyl ek haar eerste verjaarsdag beplan het, het ek besef dat daar iets in my lê wat net wakker word wanneer ek ’n partytjie mooi maak: ’n opregte liefde vir kinderpartytjies en vir elke detail wat ’n dag spesiaal maak.

Wat aanvanklik net ’n passie vir my eie kind was, het jaar na jaar die hoogtepunt van my kalender geword. Ek het elke verjaarsdag, troue, babatee en geleentheid vir familie en vriende met oorgawe aangepak, sonder om te dink dat dit eendag ’n besigheid kon word.

Maar soos die bekende sê: “As jy doen waarvoor jy lief is, sal jy nooit ’n dag in jou lewe werk nie.”

In 2024 het alles op die mooiste manier verander. Die venue waar ek en my man getroud is, het my genader om die kinder-tafels vir hul funksies te doen. Dit was nie net ’n geleentheid nie — dit was ’n bevestiging. ’n Sein dat my passie ’n roeping is… en dat dit tyd is om dit met die wêreld te deel.

Vandag is Alles Mooi vir my meer as net ’n dekorbesigheid. Dit is ’n manier om vreugde, kleur en spesiale oomblikke deel te maak van ander se stories. Om te sien hoe ’n kind se gesig ophelder of hoe ’n bruid glimlag wanneer sy haar droomtema sien — dit bly vir my ’n voorreg.

Ek wil God eer vir die talent wat Hy aan my toevertrou het. Elke projek glinster omdat Hy my die vermoë gee om dit met liefde te doen.

​

Die naam sê alles: Alles Mooi.
As jy dit kan droom, as dit mooi is, kan ek dit skep.